Ye sawal aksar logon ke zehan me aata hai ke Imam Jafar Sadiq RadiAllahu Anhu ka Wisal 15 Rajab ko hua, phir Kunde ki Niyaz 22 Rajab ko kyun ki jati hai? Kya ye jaiz hai? Aur iski asal bunyaad kya hai?
Is post me hum har sawal ka jawab simple asaan alfaz me, daleel ke sath aur bila ghulu (over) ke samjhane ki koshish karenge, taake har kisi ko baat clear aur saaf samajh aa jaye.
Kunde Ki Niyaz Kya Hai?
Sabse pehle ye samajhna zaroori hai ke Kunde Ki Niyaz kya hai? Kunde Ki Niyaz ki Haqeeqat kya hai? aur Kunde Ki Niyaz karte kyu hai?
Kunde ki Niyaz asal me Esale Sawab hai jaise doosre Niyaz 11vi Sharif ki niyaz, 12vi sharif ki niyaz, Muharram ki niyaz, Imam Husain ki Niyaz karte hai.
Aur Esale Sawab bila shuba jaiz hai.
Quran, Hadith aur Salaf-e-Saliheen ke amal se ye baat sabit hai ke mayyit ko sawab pahunchana (khana khilakar, dua karke, sadqa karke) ek nek aur mustahab amal hai.
22 Rajab ko Kunde Ki Niyaz Kyun?
Imam Jafar Sadiq RadiAllahu Anhu ka wisal sharif 15 Rajab ko hua to 22 Rajab kaha se aaya aur Kunde ki Niyaz 22 ko kyu arte hai?
Imam Ja‘far Sadiq RadiAllahu Anhu ka Wisal 15 Rajab ko hua, lekin 22 Rajab ko fatiha aur niyaz karne ki wajah ye hai:
Mashhoor Taba‘ee Hazrat Ta’woos bin keesan RadiAllahu Ta’ala Anhu se ye riwayat manqool he ki Imam Jafar Sadiq RadiAllahu Ta’ala Anhu Ka wisal 15 Rajab ko hua aap ke wisal ke baad aap ke lawahiqeen (relativs) ne 7 din tak esale sawab ka ahtemam kiya fir 7ve din yaani 22 rajab ko aali shan paymana par fatiha ka ahtemam kiya gaya.
Is ke baad se 22 ko log fatiha dilane lage jo kunde ke naam se mash’hoor he, iski wajah ye he ki us zamane me kisi ke inteqal par saat (7) dino tak gurba’a w masakeen ko khana khilana mustahab jante the or fir aakir din bahut zyada ahtemam karte the Imam Jafar Sadiq ke ham asr satar Sahaba e kiram ki ziyarat karne wale Jaleelul Qadr taba’ee hazrat ta’woos bin keesan ka qaul Hazrat Abu Nu’aym al-Isfahani Hilyatul Auliya me naql farmate he
حَدّ َثَنَاأَبُوبَكْرِبْنُ مَالِكٍ،ثناعَبْدُ اللَّهِ بْنُ أَحْمَدَبْنِ حَنْبَلٍ، حدثناأَبِي، حدثنا هَاشِمُ بْنُ الْقَاسِمِ، حدثناالأَشْجَعِيُّ،عَن سُفْيَانَ،قَالَ:قَالَ طَاوُسٌ:”إِنَّ الْمَوْتَى يُفْتَنُونَ فِي قُبُورِهِمْ سَبْعًا،فَكَانُوا يَسْتَحِبُّونَ أَنْ يُطْعَمَ عَنْهُمْ تِلْكَ الأَيَّامِ”
📚 (Hilyatul Auliya, Hadith: 4593)
Yahi riwayat Imam Ahmad bin Hanbal ne apni kitab Al-Zuhd me bhi naql farmayi hai.
Isi tarah Allama Jalaluddin Suyuti Alaihir Rahmah likhte hain:
“Sahaba-e-Kiram wafat pa jane walon ki taraf se 7 din tak khana khilaya karte the.”
📚 (Al-Hawi lil Fatawa, Jild 2, Safha 223)
Is liye Imam Jafar Sadiq RadiAllahu Anhu ke wisal ke baad 7ve din, yani 22 Rajab ko badi fatiha aur niyaz ka ehtimam kiya gaya.
Baad me ye amal “Kunde ki Niyaz” ke naam se mashhoor ho gaya.
Hazrat Ameer Muawiya Ke Wisal Ki Tareekh
22 Rajab ko Kunde Ki Niyaz karne ki ek hikmat ye bhi hai ki 22 Rajab ko Hazrat Ameer Muawiya RadiAllahu Anhu ka yaum e wisaal hai. Is din Imam Jafar Sadiq RadiAllahu Anhu aur Hazrat Ameer Muawiya RadiAllahu Anhu ka Niyaz ek saath karke shia jamaat ka rad hai aur hum ye paigham dete hai ki Ahle Sunnat ke Sar ke Taaj Ahlebait bhi hai aur Ashaab e Rasool bhi hai.
“Ahle Sunnat Ka Hai Beda Paar Ashaabe Huzoor
Najm Hain Aur Naau Hai Itrat Rasoolullah Ki”
Is liye Ahle Sunnat (Sunni) Musalaman
Imam Jafar Sadiq RadiAllahu Anhu
Aur Hazrat Ameer Muawiya RadiAllahu Anhu
dono bujurgo ke naam seek hi din Esal-e-Sawab karte hai.
Kya Kunde Ki Niyaz Bidat ya Na-Jaiz Hai?
- Agar ise farz ya wajib samjha jaye aur na karne par gunah to bilkul na-jaiz hai.
- Agar ise Isal-e-Sawab, nafl, aur nek amal samjha jaye to bilkul jaiz aur Quran o Hadith se durust bhi hai.
Ghalat Rasm o Riwaz
- Ye Kunde Ki Niyaz doosri Niyazo ki hi Tarah hai.
- Iska pakan khana, isme har Tarah ka amal, shariat ke amal se hai.
- Isme koi pabandi jaise Naa-paak aurato na Kunde ki Niyaz na banana aur haath na lagana, sirf kunwari (unmarried) ladki hi ye Niyaz banayenge aur jaha pake wahi Niyaz ho aur jaha Niyaz ho wahi khaya jaye aur Niyaz ka khana waha se bahar na le jaye ye sab ghalat aur ghair sharah hai.
- Ye Niyaz Adab o Ehtram se koi bhi paka sakta hai aur kisi bhi bartan me paka sakte hai. Koi bhi ise kha sakta hai. Jaha chahe paak saaf jagah kha sakta hai khane ke sunnat ke adaab se.
Summary
- Kunde Ki Niyaz Imam Jafar Saqid Ki Niyaz Hai
- Imam Jafar Sadiq ka Wisal: 15 Rajab
- 7 din tak Esal-e-Sawab: Salaf ka amal
- 7wa din: 22 Rajab
- Kunde ki Niyaz: Jaiz Isal-e-Sawab
- Khana, Pakana sab shariat ke dayere ne aur doosri niyazo ki tarah.
- 22 Rajab Yaum e Wisal Hazrat Ameer Muawiya RadiAllahu Anhu
- Dono Bujurg ke naam esal e sawab
Conclusion
Kunde ki Niyaz asal me Isal-e-Sawab ka ek jaiz aur mustahab tareeqa hai, jiska maqsad sirf Allah Ta‘ala ki raza hasil karna aur buzurgan-e-deen ko sawab pahunchana hota hai. Iska ta‘alluq Imam Ja‘far Sadiq RadiAllahu Anhu ke Wisal ke baad 7 din tak ki jane wali fatiha se jura hua hai, isi liye 22 Rajab ko ye amal zyada mashhoor ho gaya.
Islam me dua, sadqa aur khana khilana hamesha se nek aur pasandeeda a‘maal rahe hain. Kunde ki Niyaz bhi jab nafl amal samajh kar ki jaye, bina ise farz ya deen ka lazmi hissa banaye, to ye bilkul jaiz hai aur sawab ka zariya hai.
Wallahu Alam bis-Sawab
FAQs – Frequently Asked Questions
Aapki Raaye Hamare Liye Aham Hai!
Agar aapko yeh Mazmoon pasand aaya ho ya aapke dil mein koi sujhaav ho, toh neeche comment zaroor karein. Aapka feedback humein behtar content banane mein madad karta hai.
Dosto ke saath bhi share karna na bhoolen!
Shukriya!
– Jazakallahu Khair / جزاک اللہ خیر –
Pingback: Imam Jafar Al-Sadiq – Ilm, Taqwa Ke Aftab | Brief Biography - Islam Is The Great