Qasida e Meraj – Wo Sarwar e Kishwar e Risalat Lyrics | Kalam e Ala Hazrat

Wo Sarwar e Kishwar e Risalat Jo Arsh Par Jalwa-Gar Hue The
Naye Nirale Tarab Ke Samaan Arab Ke Mehman Ke Liye The

Bahaar Hai Shadiyan Mubarak Chaman Ko Abadiyan Mubarak
Malak Falak Apni Apni Lay Mein Yeh Ghar Anadil Ka Bolte The

Wahan Falak Par Yahan Zameen Mein Rachi Thi Shadi Machi Thi Dhoomein
Udhar Se Anwaar Hanste Aate Idhar Se Nifhat Uth Rahe The

Yeh Chhoot Parti Thi Un Ke Rukh Ki Ke Arsh Tak Chandni Thi Chhatki
Woh Raat Kya Jagmaga Rahi Thi Jaga Jaga Nasb Aaine The

Nayi Dulhan Ki Phaban Mein Kaaba Nikhar Ke Sanwara Sanwar Ke Nikhra
Hajar Ke Sadqe Kamar Ke ek Til Mein Rang Lakhon Banao Ke The

Nazar Mein Dulha Ke Pyare Jalwe Haya Se Mahrab Sar Jhukaye
Siyah Parde Ke Munh Par Aanchal Tajalli-e-Zaat-e-Bahat Se The

Khushi Ke Badal Umad Ke Aaye Dilon Ke Ta’oos Rang Laye
Woh Naghma-e-Naat Ka Sama Tha Haram Ko Khud Wajd Aa Rahe The

Yeh Jhooma Meezab-e-Zar Ka Jhoomar Ke Aa Raha Kaan Par Dhalak Kar
Phoohar Barsi To Moti Jhar Kar Hateem Ki God Mein Bhare The

Dulhan Ki Khushboo Se Mast Kapde Naseem Gustakh Aanchalon Se
Ghilaf-e-Mushkeen Jo Udh Raha Tha Ghazaal Nafay Basa Rahe The

Pahadiyon Ka Woh Husn-e-Taz’een Woh Oonchi Choti Woh Naaz O Tameen
Saba Se Sabza Mein Lahrain Aati Dupattay Dhani Chune Hue The

Naha Ke Nehron Ne Woh Chamakta Libas Aab-e-Rawan Ka Pahna
Ke Mojain Chhadiyan Thi Dhaar Lachka Hibaab-e-Taban Ke Thal Tike The

Purana Purdagh Malgaja Tha Utha Diya Farsh Chandni Ka
Hujoom-e-Taar-e-Nigaah Se Koson Qadam Qadam Farsh Baadle The

Ghubaaar Ban Kar Nisar Jaun Kahan Ab Us Rah-Guzar Ko Paye
Hamare Dil Hooriyon Ki Aankhen Farishton Ke Par Jahan Bichhe The

Khuda Hi De Sabr Jaan-e-Pur-Gham Dikhaun Kyun Kar Tujhe Woh Aalam
Jab Un Ko Jhurmat Mein Le Ke Qudsi Jinan Ka Dulha Bana Rahe The

Utaar Kar Un Ke Rukh Ka Sadqa Yeh Noor Ka Bat Raha Tha Baada
Ke Chand Suraj Machal Machal Kar Jabeen Ki Khairat Mangte The

Wohi To Ab Tak Chhalak Raha Hai Wohi To Joban Tapak Raha Hai
Nahane Mein Jo Gira Tha Pani Katore Taron Ne Bhar Liye The

Bacha Jo Talwon Ka Un Ke Dhawan Bana Woh Jannat Ka Rang O Roghan
Jinhon Ne Dulha Ki Pai Utran Woh Phool Gulzar-e-Noor Ke The

Khabar Yeh Tahweel-e-Maher Ki Thi Ke Rut Suhani Ghadi Phiregi
Wahan Ki Poshak Zeb Tan Ki Yahan Ka Joda Badha Chuke The

Tajalli-e-Haq Ka Sahra Sar Par Salat O Tasleem Ki Nichawar
Do Roya Qudsi Pare Jama Kar Khade Salami Ke Waste The

Jo Hum Bhi Wan Hote Khaak-e-Gulshan Lipat Ke Qadmon Se Lete Utran
Magar Karein Kya Naseeb Mein To Yeh Na-Muradi Ke Din Likhe The

Abhi Na Aaye The Pusht-e-Zeen Tak Ke Sar Hui Maghfirat Ki Shillak
Sada-e-Shafaat Ne Di Mubarak Gunaah Mastana Jhoomte The

Ajab Na Tha Rakhsh Ka Chamakna Ghazaal Dam Khurdah Sa Bhadakna
Shuaen Bukke Uda Rahi Thi Tadapte Aankhon Pe Saaiqe The

Hujoom-e-Umeed Hai Ghatao Muradein De Kar Inhein Hatao
Adab Ki Baagein Liye Badhao Malaika Mein Yeh Ghulghule The

Uthi Jo Gard-e-Rah-e-Munawwar Woh Noor Barsa Ke Raste Bhar
Ghire The Badal Bhare The Jal Thal Umad Ke Jangal Ubal Rahe The

Sitm Kya Kaisi Mat Kati Thi Qamar Woh Khaak Un Ke Rah Guzar Ki
Utha Na Laya Ke Malte Malte Yeh Daagh Sab Dekhta Mite The

Buraaq Ke Naqsh-e-Sum Ke Sadqe Woh Gul Khilaye Ke Saaray Rastay
Mahekte Gulban Lahekte Gulshan Hare Bhare Lahlaha Rahe The

Namaz-e-Aqsa Mein Tha Yehi Sirr Ayaan Hoon Ma’ni-e-Awwal Aakhir
Ke Dast-Basta Hain Peechhe Hazir Jo Saltanat Aage Kar Gaye The

Yeh Un Ki Aamad Ka Dab-Daba Tha Nikhaar Har Shey Ka Ho Raha Tha
Nujoom O Aflaak Jaam O Meena Ujalte The Khangaalte The

Niqab Ulte Woh Maher-e-Anwar Jalal-e-Rukhsar Garmiyon Par
Falak Ko Haibat Se Tap Chadhi Thi Tapakte Anjum Ke Aable The

Yeh Josh-e-Noor Ka Asar Tha Ke Aab-e-Gohar Kamar Kamar Tha
Safaa-e-Rah Se Phisal Phisal Kar Sitaare Qadmon Pe Laut’te The

Badha Yeh Lahra Ke Bahr-e-Wahdat Ke Dhul Gaya Naam-e-Rait-e-Kasrat
Falak Ke Teelon Ki Kya Haqiqat Yeh Arsh O Kursi Do Bulbule The

Woh Zill-e-Rehmat Woh Rukh Ke Jalway Ke Taaray Chhupte Na Khilnay Paate
Sunehri Zarbafat Oodi Atlas Yeh Thaan Sab Dhoop Chhaon Ke The

Chalawa Sarv-e-Chaman Kharamaan Na Ruk Saka Sidra Se Bhi Daaman
Palak Jhapat’ki Rahi Woh Kab Ke Sab Ain-O-Aan Se Guzar Chuke The

Jhalak Si Ik Qudsiyon Par Aayi Hawa Bhi Daaman Ki Phir Na Paayi
Sawari Dulha Ki Door Pohnchi Baraat Mein Hosh Hi Gaye The

Thakay The Rooh-Ul-Ameen Ke Baazu Chhuta Woh Daaman Kahan Woh Pehlu
Rikaab Chhooti Umeed Tooti Nigaah-e-Hasrat Ke Walwalay The

Rawish Ki Garmi Ko Jis Ne Socha Dimaagh Se Ik Bhuboo Sa Phoota
Khirad Ke Jangal Mein Phool Chamka Dahr Dahr Pair Jal Rahe The

Jilo Mein Jo Murgh-e-Aqal Uray The Ajab Buray Haalon Girtay Partay
Woh Sidra Hi Par Rahe Thak Kar Charha Tha Dam Tevar Aa Gaye The

Qawi The Murghan-e-Wahm Ke Par Uray To Urnay Ko Aur Dam Bhar
Uthai Seenay Ki Aisi Thokar Ke Khoon-e-Andesha Thooktay The

Suna Yeh Itnay Mein Arsh-e-Haq Ne Ke Lay Mubarak Hon Taaj Walay
Wohi Qadam Khair Se Phir Aaye Jo Pehlay Taaj-e-Sharaf Teray The

Yeh Sun Ke Be-Khud Pukaar Utha Nisar Jaun Kahan Hain Aaqa
Phir Un Ke Talwon Ka Paon-Bosah Yeh Meri Aankhon Ke Din Phiray The

Jhuka Tha Majray Ko Arsh-e-Aala Giray Thay Sajday Mein Bazm-e-Bala
Yeh Aankhein Qadmon Se Mal Rahi Thin Woh Gard Qurban Ho Rahe The

Ziyaen Kuch Arsh Par Yeh Aayin Ke Saari Qandeelain Jhilmalayin
Huzoor-e-Khursheed Kya Chamakta Chiraagh Munh Apna Dekhtay The

Yehi Sama Tha Ke Paik-e-Rehmat Khabar Yeh Laya Ke Chaliye Hazrat
Tumhari Khatir Kushaada Hain Jo Kaleem Par Band Rastay The

Barha Aye Muhammad Qareen Ho Ahmad Qareeb Aa Sarwar-e-Mumajjid
Nisar Jaun Yeh Kya Nida Thi Yeh Kya Sama Tha Yeh Kya Mazay The

Tabarak-Allah Shaan Teri Tujhi Ko Zaiba Hai Be-Niyaazi
Kahin To Woh Josh-e-Lan-Taraani Kahin Taqazay Wisaal Ke The

Khirad Se Keh Do Ke Sar Jhuka Lay Guman Se Guzray Guzarnay Walay
Paray Hain Yahan Khud Jihat Ko Laalay Kisay Bataen Kidhar Gaye The

Suraagh-e-Ain-O-Mata Kahan Tha Nishan-e-Kaif-O-Ila Kahan Tha
Na Koi Raahi Na Koi Saathi Na Sang-e-Manzil Na Marhalay The

Udhar Se Payham Taqazay Aana Idhar Tha Mushkil Qadam Barhana
Jalal O Haibat Ka Samna Tha Jamaal O Rehmat Ubhaartay The

Badhe To Lekin Jhijhakte Darte Haya Se Jhukte Adab Se Rukte
Jo Qurb Unhi Ki Rawish Pe Rakhtay To Lakhon Manzil Ke Faasle The

Par Un Ka Badhna To Naam Ko Tha Haqiqatan Fal Tha Udhar Ka
Tanazzulon Mein Taraqqi Afza Dana Tadal-la Ke Silsile The

Hua Na Aakhir Ke Aik Bajra Tamawuj-e-Bahr-e-Hu Mein Ubhra
Dana Ki Godi Mein Un Ko Lay Kar Fana Ke Langar Utha Diye The

Kise Mile Ghaat Ka Kinara Kidhar Se Guzra Kahan Utara
Bhara Jo Misal-e-Nazar Tarara Woh Apni Aankhon Se Khud Chhupay The

Uthay Jo Qasr-e-Dana Ke Parday Koi Khabar De To Kya Khabar De
Wahan To Jaa Hi Nahin Du’i Ki Na Keh Ke Woh Bhi Na Thay Aray The

Woh Bagh Kuch Aisa Rang Laya Ke Ghuncha-O-Gul Ka Farq Uthaya
Girih Mein Kaliyon Ki Bagh Phoolay Gulon Ke Tukmay Lagay Hue The

Muheet O Markaz Mein Farq Mushkil Rahay Na Faasil Khutoot-e-Wasil
Kamanen Hairat Mein Sar Jhukaye Ajeeb Chakkar Mein Daairay The

Hijaab Uthnay Mein Lakhon Parday Har Aik Parday Mein Lakhon Jalway
Ajab Ghari Thi Ke Wasl O Firqhat Janam Ke Bichray Galay Milay The

Zabanain Sookhi Dikha Ke Maujein Tarap Rahi Thin Ke Pani Paen
Bhanwar Ko Yeh Zauf-e-Tishnagi Tha Ke Halqay Aankhon Mein Par Gaye The

Wohi Hai Awwal Wohi Hai Aakhir Wohi Hai Baatin Wohi Hai Zaahir
Usi Ke Jalway Usi Se Milna Usi Se Us Ki Taraf Gaye The

Kaman-e-Imkaan Ke Jhoothay Nuqto Tum Awwal Aakhir Ke Phair Mein Ho
Muheet Ki Chaal Se To Poochho Kidhar Se Aaye Kidhar Gaye The

Idhar Se Thin Nazar Shah Namazein Idhar Se Inaam-e-Khusrawi Mein
Salam O Rehmat Ke Haar Gundh Kar Gulu-e-Pur Noor Mein Paray The

Zaban Ko Intezaar-e-Guftan To Gosh Ko Hasrat-e-Shaneedan
Yahan Jo Kehna Tha Keh Liya Tha Jo Baat Sunni Thi Sun Chukay The

Woh Burj-e-Bathha Ka Maah-Paara Bahisht Ki Sair Ko Sudhaara
Chamak Pe Tha Khuld Ka Sitara Ke Is Qamar Ke Qadam Gaye The

Saroor-e-Maqdam Ki Roshni Thi Ke Taabishon Se Meh-e-Arab Ki
Jinaan Ke Gulshan Thay Jhaarr Farshi Jo Phool Thay Sab Kanwal Banay The

Tarab Ki Naazish Ke Haan Lachkiye Adab Woh Bandish Ke Hil Na Sakiye
Yeh Josh-e-Ziddain Tha Ke Poday Kashakash-e-Arra Ke Talay The

Khuda Ki Qudrat Ke Chand-e-Haq Ne Karon Manzil Mein Jalwa Kar Ke
Abhi Na Taron Ki Chhaon Badli Ke Noor Ke Tadray Aa Liye The

Nabi-e-Rehmat Shafi-e-Ummat Raza Pe Lillah Ho Inayat
Ise Bhi Un Khil’aton Se Hissa Jo Khaas Rehmat Ke Waan Batay The

Sana-e-Sarkar Hai Wazifa Qubool-e-Sarkar Hai Tamanna
Na Shayari Ki Hawas Na Parwa Rawi Thi Kya Kaisay Qafiye The