Eid ka din khushi, shukr aur ibadat ka din hota hai. Is din ki shurat, is din ki sab se aham ibadat Eid Ki Namaz se hoti hai. Bohat se log har saal Eid ki namaz padhte hain, lekin phir bhi unke zehan me ye sawal hota hai ke Eid ki namaz ka sahi tareeqah kya hai, kitni takbeerein hoti hain, aur agar der se namaz mile to kya karein. aur ye hona jaiz bhi hai kyuki ye namaz saal me sirf 2 baar hi aati hai.
Is guide me hum Eid Ki Namaz Ka Tarika, 6 zaid takbeeron ka masla, imam ke peeche padhne ka sahi method, aur zaroori masail ko asaan alfaaz me samjhenge, taake har shakhs asani se samajh sake.
(Is blog ko share kare aur save jaroor karle taki har Namaz e Eid se pahle ye padh sake.)
Namaz-e-Eid Kya Hai?
Namaz-e-Eid 2 rakat wajib namaz hai jo Eid-ul-Fitr aur Eid-ul-Adha ke mauqe par jamaat ke saath padhi jati hai. Is namaz ki khas baat ye hai ke is me aam namazon se zyada zaid takbeerein hoti hain.
Eid ki namaz ke baad khutba hota hai, jise tawajju ke saath sunna chahiye.
Eid Ki Namaz Ki Niyat
Niyyat dil ke irade ka naam hai. Zaban se kehna bhi jaiz hai. Misal ke taur par Eid ul Fitr ki Namaz ki niyyat is tarah ki ja sakti hai:
“Niyyat ki maine 2 rakat namaz Eid ul Fitr ki wajib, zaid 6 takbiron ke saath, peeche is imam ke, waste Allah Ta’ala ke, rukh mera Kaaba Shareef ki taraf.”
Eid ul Adha namaz ki niyat me bas Eid ul Fitr ki jagah Eid ul Adha keh diya jaye.
Eid Ki Namaz Ka TariKa – Step by Step
Pehli Rakat
Sab se pehle imam ke saath namaz ki saf me kharay ho jayein. Niyyat karne ke baad:
- Imam Allahu Akbar kahega
- Aap bhi Allahu Akbar keh kar kaano tak haath uthayein
- Phir haath baandh lein
- Iske baad Sana padhein
Phir imam jab zaid takbeerein kahe:
- Doosri takbeer me haath kano tak uthakar chhod dein
- Teesri takbeer me bhi haath kano tak uthakar chhod dein
- Chauthi takbeer me haath uthakar dobara haath baandh lein
Yani:
- Pehli takbeer me haath baandhna hai
- Agli 2 takbeeron me haath chhodna hai
- 4th takbeer me phir haath baandh lena hai
Uske baad imam aahista A’oozu Billah aur Bismillah padhega, phir buland aawaz se Surah Fatiha aur koi surah padhega. Phir ruku aur sajde kiye jayenge.
Doosri Rakat
Doosri rakat me imam pehle Surah Fatiha aur koi surah padhega. Iske baad:
- 3 martaba Allahu Akbar kahi jayegi
- Har martaba haath kaano tak uthakar chhod diye jayenge
- Phir 4th martaba baghair haath uthaye Allahu Akbar kehte hue ruku me chale jayenge
Phir aam namazon ki tarah sajda, tashahhud, durood, dua aur salam ke saath namaz mukammal ki jayegi.
Namaz ke baad khutba suna jata hai, is liye namaz ke baad foran uth kar jana nahi chahiye.
Eid Ki Namaz Me Kitni Takbeerein Hoti Hain?
Eid ki namaz me 6 zaid takbeerein hoti hain:
Pahli Rakat
- 3 zaid takbeerein
- Qiraat se pehle
- Takbeer-e-Tahreema ke baad
Doosri Rakat
- 3 zaid takbeerein
- Qiraat ke baad
- Takbeer-e-ruku se pehle
Har takbeer me haath uthaye jayenge. Har 2 takbeeron ke darmiyan 3 tasbeeh ke barabar rukna behtar hai.
Eid Ki Namaz Ke Zaroori Masail
Eid ki namaz me chand masail samajhna bohat zaroori hai, khas taur par un logon ke liye jo der se jamaat me shamil hote hain.
1) 6 Zaid Takbeerein Wajib Hain
Eidain me 6 zaid takbeerein wajib hain. Isi tarah doosri rakat ki takbeer-e-ruku bhi wajib hai.
2) Agar Imam Zyada Takbeerein Keh De
Agar imam 6 se zyada takbeerein keh de to muqtadi bhi imam ki pairwi kare. Lekin 13 takbeeron se zyada me pairwi nahi ki jayegi.
3) Agar Muqtadi Der Se Pehli Rakat Me Shamil Ho
Agar pehli rakat me imam ke takbeer kehne ke baad muqtadi shamil hua to foran 3 takbeerein keh le, chahe imam ne qiraat shuru kar di ho.
4) Agar Imam Ruku Me Chala Gaya
Agar muqtadi takbeerein na keh saka aur imam ruku me chala gaya to khade khade takbeerein na kahe, balke imam ke saath ruku me chala jaye aur ruku me takbeerein keh le.
5) Agar Ruku Me Imam Mil Jaye
Agar imam ruku me mil gaya aur ghalib gumaan hai ke takbeerein keh kar ruku mil jayega to pehle takbeerein keh le phir ruku me jaye. Warna seedha ruku me jaye aur ruku me takbeerein keh le.
6) Agar Ruku Me Takbeerein Mukammal Na Ho Sakein
Agar imam ruku se uth gaya aur muqtadi ki takbeerein mukammal na hui hon to baqi takbeerein saaqit ho jayengi.
7) Agar Imam Ruku Se Uthne Ke Baad Shamil Ho
Agar imam ruku se uth gaya aur muqtadi ki takbeerein mukammal na hui hon to baqi takbeerein saaqit ho jayengi.
8) Ruku Me Haath Uthana Nahi
Jahan ruku me takbeer kehna bataya gaya hai, wahan haath nahi uthaye jayenge.
9) Agar Doosri Rakat Me Shamil Ho
Agar banda doosri rakat me shamil hua to pehli rakat ki takbeerein us waqt na kahe. Jab apni chhuti hui rakat padhe tab kahe.
10) Agar Imam Takbeer Bhool Jaye
Agar imam takbeer kehna bhool gaya aur ruku me chala gaya to na qiyam ki taraf lautega aur na ruku me takbeer kahega.
Eid Ki Namaz Ke Baad
Namaz-e-Eid ke baad khutba suna jata hai. Bohat se log namaz ke baad foran chale jate hain, lekin ye durust rawayya nahi. Eid ke khutbe me deen ki naseehat, dua aur rehnumai hoti hai.
Is liye:
- Sukoon ke saath khutba sunein
- Dua me shamil hon
- Allah ka shukr ada karein
- Apne liye, walidain ke liye aur ummat ke liye dua karein
Eid Ki Namaz Me Hone Wali Ghaltiyan
Namaz-e-Eid me kuch ghaltiyan bohat common hoti hain:
- Takbeeron ki tadaad bhool jana
- Pehli aur doosri rakat ki takbeeron ko mix kar dena
- Har jagah haath utha dena, hatta ke ruku wali takbeer me bhi
- Khutbe se pehle chalay jana
- Der se shamil hone par masla na samajhna
Is liye Eid se pehle ek martaba tareeqah zaroor samajh lena chahiye.
FAQs – Frequently Asked Questions
Conclusion
Eid Ki Namaz ka tarika samajhna har musalman ke liye zaroori hai, kyun ke ye saal me do martaba aane wali ek aham ibadat hai. Is namaz ki sab se khas baat 6 zaid takbeerein hain, jin ka sahi maqam aur tareeqah samajhna bohat zaroori hai. Agar aap imam ke peeche sahi order ke saath namaz padhein, khutba sunein aur masail ko samajh kar amal karein, to in sha Allah Eid ki namaz durust tareeqe se ada hogi.
References/Hawala:
- Durr-e-Mukhtar, Kitab-us-Salah, Bab-ul-Eidain, Vol. 3, p. 3
- Radd-ul-Muhtar, Kitab-us-Salah, Bab-ul-Eidain, Vol. 3, pp. 63, 65
- Al-Fatawa Al-Hindiyyah, Kitab-us-Salah, Al-Bab-us-Sabi’ Ashar fi Salat-il-Eidain, Vol. 1, p. 151
Aapki Raaye Hamare Liye Aham Hai!
Agar aapko yeh Mazmoon pasand aaya ho ya aapke dil mein koi sujhaav ho, toh neeche comment zaroor karein. Aapka feedback humein behtar content banane mein madad karta hai.
Dosto ke saath bhi share karna na bhoolen!
Shukriya!
– Jazakallahu Khair / جزاک اللہ خیر –
